Kryetari i Lëvizjes Vetëvendosje, Albin Kurti përmes një postimi në Facebook, ka kujtuar ish-aktivistin e kësaj Lëvizjeje, Astrit Deharin, i cili sot do të festonte datëlindjen e 28-të.
Për më tepër Kurti ka shkruar se Astrit Dehari, i cili vdiq në burg si shumë dëshmorë të lirisë para tij, tregon se ende koha e heronjve është aktuale për ne.
Kurti gjithashtu përmes këtij postimi ka uruar edhe veprimtarin Adem Demaçi me rastin e 82 vjetorit të tij.
Ja postimi i plotë i Kurtit:
Në secilën kohë, njeriu ka dëshirë të mendojë se heronjtë, dëshmorët, i përkasin së shkuarës, se ata i përkasin historisë që e gjejmë në libra, se në të tashmen jemi qytetarë, njerëz, individë, e nuk ka më vend a nevojë për heroizma.
Koha e heroizmave është kohë vërtet fatkeqe, kohë kur kundër dhunës së pushteteve tiranike nuk ngrihet një popull i tërë, që të vendosë lirinë, demokracinë e drejtësinë e vet, por vetëm pak njerëz të paepur, të cilët me sakrificën e vet e trimërojnë shumicën e popullsisë dhe e frikësojnë pakicën despotike.
Vërtet pra, një popull me qytetari të lartë, që nuk e toleron tiraninë e despotizmin, i tejkalon heronjtë e dëshmorët, i lë ata në të shkuarën.
Por Astrit Dehari, mbytur në burg si shumë dëshmorë të lirisë para tij, na tregon se ende koha e heronjve është aktuale për ne. Është aktuale sepse kemi prezente regjimet e dhunshme dhe despotizmin tradhtar, e njëkohësisht kemi prezent edhe pasivitetin shoqëror, të cilin e shkund vetëm një subjekt, fatkeqësisht.
Sot, më 26 shkurt, në ditëlindjen e Astrit Deharit, nëse duam që koha e heronjve dhe e dëshmorëve të lihet pas, duhet të kuptojmë se kjo nuk arrihet pa e rrëzuar në të njëjtën kohë, edhe tiraninë pushtetare, edhe indiferencën qytetare.
E sot, i urojmë ditëlindjen edhe Adem Demaçit, heroit të gjallë të qëndresës dhe mospërkuljes përballë çdo pushteti tiran e gjakatar.
