Bërnabiç mohon të ketë kërkuar tërheqjen e njohjes së Kosovës nga shtetet e OKB-së

Mos i humb

Kryeministrja e Serbisë, Ana Bërnabiç, ka thënë se nuk ka kërkuar nga asnjë anëtarë i OKB-së tërheqjen e njohjes për Kosovën.

Kryeministrja e Serbisë, Ana Bërnabiç, ditë më parë i kishte dërguar kryeministrit të Shqipërisë Edi Rama një letër përmes së cilës i kërkonte rishqyrtimin e njohjes së Kosovës.

Mirëpo, gjatë ditës së sotme Bërnabiç, ka thënë se përmes atyre letrave nuk ka kërkuar tërheqjen e njohjes së pavarësisë së Kosovës, por siç është shprehur ajo, ka dëshiruar t’i njoftojë ata në lidhje me veprimet e “papërgjegjshme, të pamenduara dhe të rrezikshme të Prishtinës”.

Përmes kësaj, Bërnabiç ka tentuar t’i demantojë deklarimet e kryeministrit të Kosovës, Ramush Haradinaj, i cili ditë më parë kishte thënë se, ajo ka kërkuar nga anëtarët e OKB-së që të revokojnë njohjen e pavarësisë së Kosovës, raporton “Tanjug”.

“Nuk u kam bërë thirrje shteteve anëtare të OKB-së të tërhequr njohjen e pavarësisë së Kosovës. Letrën për të cilën flet Haradinaj e ka dërguar më 16 nëntor pas ngritjes së taksës për 10 për qind. Në atë moment shumë transparent, ai ka qenë vendimi i Qeverisë që të njoftojmë shtetet anëtare të OKB-së në lidhje me veprimet e papërgjegjshme, të pamenduara dhe të rrezikshme të Prishtinës”, deklaroi Bërnabiç.

Sipas saj, përmes kësaj letre ka dashur t’i njoftojë shtetet që e kanë njohur pavarësinë e Kosovës dhe ato që nuk e kanë njohur me veprimet që kishte ndërmarrë qeveria e Kosovës.

Gjithashtu, në këtë letër Bërnabiç ka bërë të ditur se është përmendur edhe rasti i vrasjes së Oliver Ivanoviçit dhe “fakti se Kosova nuk e lejoi Serbinë që të ndihmonte në hetimin dhe se institucionet e kosovare nuk ndajnë informacione me Beogradin”.

Tutje, ajo ka bërë të ditur se në këtë letër është përmendur edhe arrestimi i Marko Gjuriqit, hyrja e njësitit të Policisë ROSU në veri të Mitrovicës si dhe kundërshtimin e marrëveshjeve nga ana e Kosovës, shkruan “Tanjug”.

Ajo deklaroi se anëtarët e OKB-së i ka njoftuar se Kosova jo vetëm që nuk respektoi marrëveshjet ndërkombëtare, siç është marrëveshja e Brukselit dhe Rezoluta 1244, por edhe ligjet e saj dhe Kushtetutën.

“Unë vetëm i kam paraqitur faktet, argumentet dhe se vendimet e Kosovës komprometojnë paqen rajonale, stabilitetin dhe gjithçka që BE po përpiqet të arrijë përmes integrimit rajonal”, deklaroi më tutje Bërnabiç.

Ndryshe, kryeministri i Kosovës të premten e kaluar deklaroi se, është e papranueshme nga ana e Bashkimit Europian që nuk reagoi në lidhje me letrën që Bërnabiç i kishte dërguar shteteve për tërheqjen e njohjes së pavarësisë së Kosovës.

- ISLAMSHOP.CH -spot_img
- ISLAMSHOP.CH -spot_img

Të fundit