Ministri i Jashtëm i Turqisë, Mevlüt Çavuşoğlu, lidhur me 25-vjetorin e gjenocidit të përjetuar në vitin 1995 në Srebrenicë në lindje të Bosnjë e Hercegovinës, postoi mesazhin “Srebrenica është një njollë e zezë e historisë dhe vendi ku dinjiteti njerëzor mori një plagë të rëndë”.
Në një postim nga Twitteri, ministri Çavuşoğlu tha: “Jemi pranë vëllezërve tanë boshnjakë në 25-vjetorin e gjenocidit të Srebrenicës. Srebrenica është një njollë e zezë e historisë dhe vendi ku dinjiteti njerëzor mori një plagë të rëndë”.
– Çfarë ndodhi në Srebrenicë?
Pas pushtimit të Srebrenicës më 11 korrik 1995 nga njësitë serbe nën komandën e Ratko Mlladiçit, civilët boshnjakë që u strehuan tek ushtarët holandezë që shërbenin në kuadër të Kombeve të Bashkuara (OKB) iu dorëzuan serbëve.
Serbët të cilët lejuan kalimin e grave dhe fëmijëve në zonën nën kontrollin e ushtarëve boshnjakë, masakruan në pjesën e pyllit, në fabrika dhe depo të paktën 8.372 meshkuj boshnjakë të cilët u varrosën nëpër varreza masive.
Trupat e viktimave që gjenden gjatë punimeve që filluan pas luftës për gjetjen e të humburve, pas identifikimit varrosen në varrezën përkujtimore Potoçari çdo vit më 11 korrik.
Këtë vit do të varrosen edhe 9 viktima të gjenocidit, identiteti i të cilëve është përcaktuar dhe miratuar nga të afërmit e tyre.
