Në Republikën Demokratike të Kongos (DRC) elefantët kanë mbytur dy persona, përfshirë një 5-vjeçar, bëri të ditur sot një grup për mbrojtjen e natyrës.
Pierre Mukamba Kaseya, një zyrtar lokal administrativ tha se elefantët po migronin nga Parku Kombëtar Upemba duke shkatërruar fushat në rrugën e tyre.
“Më 30 gusht, ndodhi një incident. Elefantët mbytën një fëmijë 5-vjeçar nga komuniteti Twa në sektorin Kamalondo, fshati Kilato dhe rasti i dytë ndodhi më 3 shtator ku një person u mbyt po ashtu nga elefantët”, u citua Mukamba teksa thoshte nga Desk Nature, një grup mediatik mjedisor në DRC.
Parku Kombëtar Upemba në Provincën Katanga, një rajon pothuajse me madhësinë e Spanjës në DRC-në juglindore, u krijua në vitin 1939 për të mbrojtur elefantët, hipopotamët dhe zebrën.
Moise Kiluba, një udhëheqës i shoqërisë civile u kërkoi autoriteteve provinciale dhe kombëtare që të merren me këtë situatë sa më shpejtë të jetë e mundur.
“Popullatat e sektorit Kyofwe dhe Kamalondo kanë vështirësi të ecin nga frika se mos shtypen nga këto kafshë”, tha ai.
