“Forca e Ligjit” në Fier, Xhafaj: Vetëm fillimi

Ministri i Brendshëm, Fatmir Xhafaj përshëndeti operacionin e policisë së Fierit dhe paralajmëron se ky është vetëm fillimi i “Forcës së Ligjit”.

“Në Fier u realizua goditja e parë e Forcës së Ligjit. Një grup më pak nga lista e narkotrafikut tashmë i asgjësuar, përgëzime policisë së Fierit dhe strukturave të drejtorisë qendrore për këtë sukses”, shkruan ai në Twitter.

Ministri i Brendshëm shpreh vendosmërinë për eleminimin e grupeve të tilla në gjithë vendin dhe jo vetëm kaq.
“Të vendosur për spastrim të plotë të grupeve kriminale dhe sekuestrim të aseteve të tyre”, vijon Xhafaj.

Policia e Shtetit njoftoi më herët se në pranga kanë përfunduar 3 persona, anëtarë të këtij grupi që kishte tendenca kriminale të theksuara.

Ata janë identifikuar si shtetasit: Kujtim Kuçi, 45 vjeç, banues në fshatin Sulaj, Fier; Bashkim Ahmeti (Kuçi), 43 vjeç, banues në fshatin Sulaj, Fier; dhe Dritan Tusha, 47 vjeç, lindur dhe banues në Shijak.

Këta persona, në bashkëpunim me njëri-tjetrin kishin ngritur një grup të strukturuar kriminal, që trafikonte drogëra të llojeve të ndryshime si kanabis, heroinë dhe kokainë, brenda dhe jashtë Shqipërisë.

Gjithashtu dyshohet se ky grup kriminal ka qënë i përfshirë në disa ngjarje të rënda si vrasje dhe rrëmbim personi, për të cilat po vijojnë hetimet./Top Channel/