Në 24 orët e fundit, në Francë janë regjistruar 3.325 raste të reja, me çka numri i përgjithshëm i të infektuarve është rritur në 223.473, njoftoi Instituti i Shëndetit Publik të Francës.
Instituti tha se 15.208 pacientë po trajtohen në spitale, përfshirë 1.429 në njësitë e kujdesit intensiv.
Numri i pacientëve në njësitë e kujdesit intensiv ka vazhduar të bie për të 50-tën ditë radhazi.
Në 24 orët e kaluara, 705 persona janë shëruar, me çka numri i përgjithshëm i pacientëve që e kanë mposhtur sëmundjen ka shkuar në 67.191.
Instituti njoftoi se në 24 orët e fundit, jetën kanë humbur 66 persona, me çka numri i viktimave ka shkuar në 28.662.
Ndërkohë, Franca ka vendosur të kalojë në fazën e dytë të lehtësimit të masave kundër pandemisë.
Nga 2 qershori, në mbarë vendin do të hapen kafetë dhe restorantet, megjithatë, në rajonin Ile-de-France, ku bën pjesë edhe Parisi, këto objekte do të lejohen t’i përdorin vetëm hapësirat e hapura.
Distanca midis tavolinave duhet të jetë të paktën një metër dhe në një tavolinë nuk guxojnë të ulen më shumë se dhjetë persona.
Nga 2 qershori po ashtu hiqet edhe ndalesa e udhëtimit më larg se 100 kilometra nga adresa e banimit. Nga kjo fundjavë, në gjithë Francën do të hapen edhe parqet, kopshtet, plazhet dhe muzetë.
Përveç Parisit, në qytetet e tjera nga data e njëjta hapen pishinat, sallat sportive dhe teatrot, ndërsa kinematë do të fillojnë të funksionojnë nga 22 qershori.