Gjithsej 127 persona në Iran kanë vdekur nga koronavirusi gjatë 24 orëve të fundit, duke e rritur numrin e vdekjeve deri në 1.812, tha të dielën një zyrtar iranian i shëndetësisë.
Sipas televizionit shtetëror iranian, zëdhënësi i Ministrisë së Shëndetësisë, Kianoush Jahanpour tha se janë zbuluar 1,411 raste të reja me virus, duke e rritur numrin e përgjithshëm të rasteve në 23,049.
Ai shtoi se gjithsej 8.376 persona, të cilët u mjekuan nga virusi, janë liruar nga spitalet.
Mosha mesatare e të infektuarve nga virusi është 59, ndërsa ata që humbin jetën janë në të 60-tat e tyre, theksoi ai.
Gjithsej 170 punonjës shëndetësorë, përfshirë 40 mjekë dhe 130 infermierë, janë testuar pozitivisht nga koronavirusi, agjencia zyrtare e lajmeve IRNA citoi një deklaratë të Universitetit të Shkencave Mjekësore të Qom.
Gjithsej 152 punonjës mjekësorë, përfshirë 25 mjekë dhe 127 infermierë, të cilët u mjekuan për virusin, janë rikuperuar, theksohet në deklaratë.
Vazhdon trajtimi i 15 mjekëve dhe tre infermierëve, thuhet më tej. Një total prej 15 punonjësve shëndetësorë kanë vdekur tashmë nga sëmundja.
Koronavirusi, i njohur zyrtarisht si COVID-19, u shfaq për herë të parë në Wuhan, Kinë, dhjetorin e kaluar dhe është përhapur në të paktën 167 vende dhe territore.