Kuvendi i Kosovës sot pritet të mbajë seancën e rregullt plenare me disa pika të rendit të ditës.
Në rend ditë janë dy interpelanca të kryeministrit Ramush Haradinaj.
Haradinaj është thirrur në interpelancë nga Grupi Parlamentar i Lëvizjes Vetëvendosje lidhur me vdekjen e Astrit Deharit në qendrën e paraburgimit në Prizren.
Po ashtu Haradinaj sipas kërkesës së Grupit Parlamentar të Lidhjes Demokratike të Kosovës është thirrur në interpelancë lidhur me vendimin për rritjen e pagave për kabinetin e tij qeveritar dhe për pagat që paguhen nga buxheti i Kosovës.
Rendi i ditës:
Interpelanca e Kryeministrit të Republikës së Kosovës, z. Ramush Haradinaj, sipas kërkesës së GP të Lidhjes Demokratike të Kosovës dhe GP të Lëvizjes Vetëvendosjes lidhur me Vendimin e Qeverisë së Kosovës nr.04/20 të datës 20.12.2017 për rritjen e pagave të anëtarëve të Kabinetit qeveritar, Vendimin nr. 05/24 i datës 12 janar 2018, për rritjen e pagave për të gjitha kategoritë e të punësuarave që marrin paga nga buxheti i Kosovës, si dhe Vendimi nr. 15/24 i datës 12 janar 2018 për lartësinë e pagesës mujore për familjet në Skemën e Ndihmave Sociale,
Debat parlamentar, sipas kërkesës së nënkryetarit të Kuvendit, z. Kujtim Shala dhe gjashtë (6) deputetëve nënshkrues lidhur me Raportin e 100 ditëve të punës të Qeverisë së Republikës të Kosovës,
Shqyrtimi i propozim-vendimit të qeverisë së Republikës së Kosovës për ratifikimin e nëntë (9) anëtarëve të Këshillit Shtetëror të Cilësisë,
Votimi i Raportit për gjendjen e mjedisit në Kosovë për vitin 2016.
Interpelanca e Kryeministrit të Republikës së Kosovës, z. Ramush Haradinaj, sipas kërkesës së Grupi Parlamentar të Lëvizjes Vetëvendosje, lidhur me vdekjen e dhunshme të aktivistit të Lëvizjes Vetëvendosje, Astrit Dehari.
