Kryeministri i Kosovës, Ramush Haradinaj, priti sot në takim presidentin e Asociacionit të Komiteteve Olimpike Kombëtare (ANOC), Sheikh Ahmad Al-Fahad Al-Sabah, me të cilin bisedoi për zhvillimin e sportit në Kosovë,.
Pas takimit nuk kishte deklaratë për media, ndërsa nga Qeveria e Kosovës njoftuan se me këtë rast falënderoi Al-Sabah, për angazhimin e tij për pranimin e Komitetit Olimpik të Kosovës në Komitetin Olimpik Ndërkombëtar, si dhe për vazhdimin e përkrahjes na avancimin e sportit në përgjithësi.
“Rinia e Kosovës është shumë e motivuar fal anëtarësimit dhe mundësisë së pjesëmarrjes së Kosovës në sportet dhe garat ndërkombëtare”, tha kryeministri Haradinaj.
Kryeministri Haradinaj po ashtu, shprehu përkushtimin e Qeverisë së Kosovës që të krijojë infrastrukturë sportive dhe hapësira të nevojshme, që sportistët dhe federatat sportive të arrijnë rezultate si në garat vendore po ashtu edhe në ato ndërkombëtare.
Presidenti i Asociacionit të Komiteteve Olimpike Kombëtare (ANOC), Sheikh Ahmad Al-Fahad Al-Sabah, falënderoi kryeministrin Haradinaj për pritjen dhe shprehu gatishmërinë që edhe më tutje të ofroj bashkëpunim dhe mbështetje për Komitetin Olimpik të Kosovës dhe për sportin në Kosovë.
Sheikh Ahmad Al-Fahad Al-Sabah qëndron në Kosovë me rastin e shënimit të pranimit trevjeçarë të Komitetit Olimpik të Kosovës në Komitetin Olimpik Ndërkombëtar dhe 25 vite nga themelimi i KOK-së./Rtv islam/
