Nënkryetari i Partisë Demokratike të Kosovës (PDK), Hajredin Kuçi ka thënë se temat e mëdha që i ka Kosova duhet të trajtohen nga të gjithë akterët dhe për këtë duhet të ketë unitet nacional të spektrit politik kosovar.
Në një intervistë për RTK, Kuçi ka thënë se asociacioni i komunave me shumicë serbe, duhet të krijohet në bazë të Kushtetutës.
“Duhet të ketë ekspertë të mirë vendorë e ndërkombëtarë. Nuk ka zgjidhje pa partneritet ndërkombëtar. Ne duhet t’i bindem ata dhe ata të bindin palën serbe”, ka thënë ai.
Sipas tij, serbët binden kur kanë presion ndërkombëtar. Ai tha se Kushtetuta e Kosovës nuk njeh pushtet të tretë në Kosovë.
Sipas tij tani në Kosovë pas demarkacionit është krijuar një konsensus politik. “Janë pesë apo gjashtë tema të mëdha që janë prodhuar, detyrimisht kushdo që është në qeveri do të merret me ato. Për demarkacionin është çështje e mbyllur. U pat krijuar një psikozë për të. Tani është krijuar një konsensus politik, nuk duhet krijohen iluzione”, është shprehur Kuçi.
Kuçi, ka folur edhe për Gjykatën Speciale dhe sipas tij kjo gjykatë është si rezultat i raportit të Dick Martyt. “Lufta jonë ka qenë luftë çlirimtare dhe ka pasur mbështetje nga NATO. Nga Gjykata do të ketë dëmtim të individëve, do të ketë dëmtim të imazhit të Kosovës”, ka thënë ai.
Kuçi ka folur edhe për aktivitetin e tij të tanishëm politik. Ai bëri me dije se ka bashkëpunim të mirë më kryetarin e PDK-së, Kadri Veseli. “Në politikë do të kem rol tjetër, roli im nuk do të jetë rol prioritar dhe i mburojës politike në parti, por do të punojë në krijimin e ideve politike. Do të isha naiv, nëse nuk do të reflektoja”, ka thënë ai. /kp/.
