Mesazh hytbeje
Ajeti kur’anor: “Nuk ka dhunë në fé”, sipas komentit të Imam Razit, ka si kuptim të vetin edhe faktin se: “Zoti i Madhëruar nuk e ka ndërtuar çështjen e besimit mbi kërcënimin dhe dhunimin e tjetrit…”.
Në komentin e tij të këtij ajeti, Imam Razi thekson gjithashtu se: “Dhunë është, nëse muslimani i thotë jomuslimanit: Ose beso, ose të vrava! Ndërsa All-llahu thotë: Nuk ka dhunë në fé”.
Në këtë kontekst, Imam Kurtubiu sjell të transmetuar një bashkëbisedim të Hz. Omerit (r.a) me një plakë të krishterë, të cilës i është drejtuar me këto fjalë: “Pranoje Islamin o plakë, se do shpëtosh. All-llahu e ka dërguar Muhammedin me të vërtetën”. Plaka ia ktheu: Unë jam plakë e moshuar dhe vdekja më është afruar! Omeri tha: “O Zot, dëshmo dhe lexoi ajetin: Nuk ka dhunë në fé”.
Rreth këtij ajeti, shumë qartë flet edhe Imam Ibni Ashuri, i cili thekson se qëllimi i këtij ajeti është të rrënjoset urdhëresa hyjnore: “Mos kërcënoni njeri në pasimin e Islamit, me dhunë… (Ky ajet) është argument i qartë i revokimit (anullimit) të krejt formave të dhunimit në fé”.
Faktin e ruajtjes së shpirtrave dhe jetëve të jobesimtarëve e vërteton edhe fakti se: “I Dërguari (a.s), dëshiroi të rikthehej në Mekkë, pa u prekur asnjë jetë e pa u derdhur asnjë pikë gjaku” dhe kështu ndodhi.
Historia vërteton se Hz. Muhammedi (a.s) urdhëroi komandantët e tij, që kur të hynin në Mekkë: “Të mos vrisnin njeri…”.
Imam Muhamed B. Sytari
Shkodër, më 13/9/2019
