Pas një ftese në rrjetet sociale, mijëra njerëz shtruan një banket të madh, rreth 500 m të gjatë, mbi urën historike ‘Charles’, në Pragë për të festuar ‘fundin’ e pandemisë në Çeki.
Përkundër paralajmërimit të OBSH-së se ‘më e keqja nuk ka ardhur ende’, pjesëmarrësit në festime nuk ruajtën as distancimin fizik dhe nuk ishin të pajisur me maska.
Ondrej Kobza, organizator i festës, i tha agjencisë së lajmeve AFP se “Ne duam të festojmë fundin e krizës së koronavirusit duke i lejuar njerëzit të takohen dhe të tregojnë se nuk kanë frikë”.
Me 12 mijë infeksione dhe 350 vdekje për 10 milion banorë, Republika Çeke ka arritur të përmbajë Covid-19 duke imponuar masa të rrepta izolimi dhe bllokimi, të cilat u hoqën vetëm javën e kaluar, por në vend po regjistrohen ende raste të reja, të paktën 20 u raportuan dje në kryeqytet.
