Sot me fillim prej orës 14:00 pritet të vazhdojë seanca e Kuvendit të Kosovës ku pritet të hidhet në votim emërimi i Ekipit Negociator të Qeverisë për dialogun me Serbinë.
Megjithatë, as sot askush nga opozita nuk pritet të marrë pjesë në këtë seancë.
Deputeti nga rradhët e LDK-së, Arben Gashi, ka thënë për lajmi.net se partia e tij nuk do të paraqitet në këtë seancë ngase ata po presin që të mbahet seanca e cila është thirrur nga opozita.
“Jo qëndrimet janë ende të njëjta, ne po presim që të mbahet seanca e cila është thirrur nga opozita, i cili është obligim kushtetues i Kryetarit të Kuvendi”, ka thënë Gashi.
E as Vetëvendosja nuk pritet të paraqitet në sallën e Kuvendit gjatë kësaj kohe që do të shqyrtohet ky propozim i Qeverisë.
Këtë e ka konfirmuar për lajmi.net, deputeti i këtij subjekti, Sami Kurteshi.
“Ende nuk kemi vendosur, mirëpo nëse nisemi nga vendimi i mëparshëm nuk do të marrim pjesë”, ka thënë Kurteshi për lajmi.net. E pranishme në sallë nuk do të jetë as PSD-ja e Shpend Ahmetit.
Këtë për lajmi.net e ka konfirmuar zëdhënësja e kësaj partie, Natyra Kuqi. Ajo ka thënë se PSD-ja qëndron prapa qëndrimeve të saja të cilat i ka bërë publike më herët
Kujtojmë se seanca e paraparë të mbahet dje për emërimin e këtij ekipi negociator është shtyer vazhdimisht nga inicuesi. Ajo pritet të fillojë sot në orën 14:00.
