Shefi i Grupit Parlamentar të LDK-së, Avdullah Hoti e ka quajtur të pa dobishme për vendin thirrjen e pozitës për unitet në dialog me Serbinë, ku sipas tij kjo thirrje është kthyer në akuzë djallëzore kundër opozitës.
Hoti ka përsëritur se LDK e mbështet dialogun me Serbinë në baza kushtetuesë, por nuk pajtohet që formati i ekipit të dialogut ta dëmtojë thelbin e demokracisë dhe kushtetutshmërisë së Kosovës.
Për me tepër, Hoti ka shkruar në Facebook se koalicioni PAN po e përdor dialogun me Serbinë për ta zhvendosur vëmendjen nga dështimet e tyre dhe për ta eklipsuar mungesën e efikasitetit qeveritar.
Ja postimi i plotë i Hotit:
Në javët e fundit, thirrjen për unitet në dialogun me Serbinë, koalicioni PAN-PSD e ka kthyer në akuzë djallëzore kundër opozitës. Kjo qasje nuk është e sinqertë dhe as e dobishme për shtetin e Kosovës, përkundrazi.
Të mos i ngatërrojmë gjërat. Ne, si gjithmonë, e përkrahim dialogun me Serbinë gjithnjë duke marrë për bazë Kushtetutën. Por, ne nuk do të pranojmë që formati i ekipit të dialogut ta dëmtojë thelbin e demokracisë dhe kushtetushmërisë në Kosovë. Kosova duhet të ketë qeveri që flet në emër të shumicës së qytetarëve në adresimin e të gjitha çështjeve.
Uniteti i cili po pretendohet të arrihet me logjikën “të merremi me Serbinë, jo me njëri tjetrin” është parullë e koalicionit PAN që ka qëllim ta amortizojë veprimtarinë opozitare dhe mbylojë dështimet e veta.
Sa herë që ne bëjmë punën tonë opozitare në mbikëqyrje të qeverisë dhe evidentim të dëmeve që po i bëhen shtetit nga kjo qeveri jo legjitime, koalicioni PAN e përdor dialogun me Serbinë për ta zhvendosur vëmendjen nga dështimet e tyre dhe për ta eklipsuar mungesën e efikasitetit qeveritar.
