Këshilltari i Sigurisë Kombëtare të Shtëpisë së Bardhë, Robert O’Brien, ka deklaruar se SHBA është “thellësisht e shqetësuar për arrestimin e Jimmy Lai-it, një biznesmen i Hong Kongut dhe avokat i shquar i demokracisë”.
Lai, themeluesi i gazetës dixhitale Apple Daily, u arrestua dje me akuzën e një marrëveshjeje të fshehtë të huaj nën ligjin e ri të sigurisë kombëtare të miratuar në pranverë nga Kina. Po ashtu u arrestuan edhe dy djemtë e tij dhe disa drejtues nga ndërmarrja e tij mediatike.
O’Brien tha se arrestimi i manjatit të mediave nga Hong Kongu ishte një përpjekje për të “frikësuar figurat e demokracisë dhe të opozitës, si dhe shtypjen e mediave të pavarura”.
Lai është një kritik i madh i shtetit kinez dhe një figurë udhëheqëse e lëvizjes pro-demokratike në Hong Kong.
SHBA në disa raste ka kritikuar ashpër ligjin e sigurisë kombëtare, duke thënë se ky ligj ka minuar autonominë e Hong Kongut dhe ka shkelur të drejtat e popullit të këtij rajoni.
“Ligji i sigurisë kombëtare i Pekinit mohon të drejtat e popullit të Hong Kongut dhe liritë e tyre themelore, si dhe rrit kontrollin e Partisë Komuniste Kineze mbi punët e brendshme të Hong Kongut”, tha O’Brien në një deklaratë.
Lai u bë personi me profil më të lartë i arrestuar sipas ligjit të ri. SHBA i bëri thirrje Pekinit të shfuqizojë ligjin e sigurisë kombëtare dhe të rivendosë sundimin e ligjit.
Më herët, sekretari amerikan i shtetit, Mike Pompeo, tha se ai ishte “thellësisht i shqetësuar” nga raportet për arrestimin e Lai-t nën “Ligjin drakonian të Sigurisë Kombëtare të Hong Kongut”.
“Dëshmi e mëtejshme që CCP (Partia Komuniste Kineze) ka evituar liritë e Hong Kongut dhe gërryen të drejtat e njerëzve të saj”, shkroi Pompeo në Twitter.
