Raportuesi për Kosovën në Parlamentin Europian, Igor Sholtes ka thënë se Kosova i ka plotësuar të gjitha kushtet e kërkuara nga BE për liberalizimin e vizave.
Sholtes, ka thënë se Kosova është i vetmi vend i Ballkanit Perëndimor ku ekzistojnë ende kërkesat për viza.
Sholtes një intervistë dhënë për “Europeaninterest”, ka deklaruar se pavarësisht faktit se Kosova i ka plotësuar të gjitha kushtet e kërkuara nga Bashkimi Europian, ky i fundit nuk e mbajti premtimin, pasi siç u shpreh ai, qytetarëve të Kosovës iu është premtuar se pas përmbushjes së kritereve të kërkuara ata do të mund të udhëtojnë lirshëm nëpër Europë.
“Kosova plotësoi dy kushtet e rëndësishme të lëshuara nga Komisioni Europian, lufta kundër korrupsionit dhe krimit të organizuar dhe së dyti demarkacionin e kufirit me Malin e Zi. E dyta ishte një çështje e ndjeshme. Dhe pastaj siç thashë nuk ndodhi asgjë. Dhe tani njerëzit në Kosovë ndjehen të zhgënjyer, besojnë se vendi nuk e meriton këtë. Kjo është për t’ju dhënë një shembull se sa problematike mund të bëhet kur ju premton diçka dhe nuk e mbani premtimin tuaj. Ne në Parlamentin Evropian dhe gjithashtu në Komision kemi një pozicion pozitiv, por vendimi përfundimtar i takon Këshillit Evropian”, ka deklaruar Sholtes.
Sipas tij, liberalizmi i vizave për Kosovën do ta ndihmonte tërë rajonin, transmeton lajmi.net. “Ne po flasim vetëm për liberalizimin e vizave që do të ndihmojë jo vetëm Kosovën, por tërë rajonin për të shmangur izolimin”, ka thënë ai.
