Një zyrtar i Policisë së Kosovës është therur me thikë sot në mesditë në Pejë.
Lajmin për Indeksonline e ka konfirmuar zëdhënësi i policisë në Pejë, Driton Rugova.
Ai ka thënë se në rrugën “Mbretëresha Teutë” në orën 11 e 55 minuta një zyrtar policor është sulmuar papritmas dhe ka pësuar lëndime trupore nga një mjet i mprehtë- thikë.
“Falë shkathtësive profesionale të zyrtarit policor dhe ndihmës së një qytetari është arritur që viktima të shpëtoi me jetë ndërsa personi i dyshuar është arrestuar”, ka thënë Rugova për Indeksonline.
Gjendja shëndetësore e policit sipas mjekut kujdestar është jashtë rrezikut për jetën.
Me urdhër të prokurorit të rastit, i dyshuari është dërguar në Qendrën e mbajtjes ndërsa rasti është cilësuar “Vrasje në tentativë”.
Nuk dihen ende motivet e këtij sulmi ndërkohë policia po merret intensivisht me zbardhjen e rastit.