Ministria për Forcën e Sigurisë së Kosovës ka organizuar ceremoninë e diplomimit të kadetëve të Forcës së Sigurisë së Kosovës.
Rrustem Berisha, Ministër i FSK-së, tha se sot është një ditë e veçantë për FSK-në dhe për të si ministër, pasi po mbahet ceremonia e diplomimit dhe gradimin e 11 kadetëve.
Berisha shtoi se gjatë periudhës 4 vjeçare kadetët kanë kaluar në sfida të ndryshme.
Gradimi i tyre, sipas ministrit është bërë në fazën më të rëndësishme të FSK-së.
“Gradimi juaj si oficer të Forcës po bëhet në fazë të rëndësishme të zhvillimit të Forcës së Sigurisë, ku edhe pritet që kjo forcë të avancoj me kapacitetet e saja dhe ta ndryshoj misionin aktual”, tha Berisha.
Berisha shtoi se po krijojnë një Forcë profesionale të besueshme dhe një Forcë që është e përfaqësuar nga të gjithë qytetarët e Kosovës dhe në interes të të gjithë qytetarëve të saj.
Është nderë dhe krenari sipas Berishës që FSK-ja nga sot do t’i ketë edhe 11 oficerë të rinj.
Ceremonia është zhvilluar në kazermën ‘Skënderbeu’, në Komandën e Doktrinës dhe Stërvitjes në Ferizaj.
Në ceremoni morën pjesë, Ministri i FSK-së, Komandanti i FSK-së dhe oficerë të FSK-së.
Të ftuar në këtë ceremoni ishin edhe udhëheqësit shtetërorë dhe institucionalë, mysafirë të shumtë dhe familjarët e kadetëve./Kosova Post/
