Presidenti i vendit, Hashim Thaçi ka folur pas takimeve që ka mbajtur me liderët politikë, Albin Kurtin, Isa Mustafën e Kadri Veselin për t’u konsultuar për hapat e mëtutjeshëm pas mocionit të mosbesimit.
Thaçi në një konferencë për media ka thënë se pavarësisht situatës së fundit të krijuar në Kosovë me përhapjen e koronavirusit, jeta institucionale duhet të vazhdojë, shkruan lajmi.net.
Ai tha se nesër do të vazhdojë takimet me liderët tjerë politik, nga ku edhe do të formësoj veprimet e tij të radhës.
“Pavarësisht vështirësive, jeta institucionale në Kosovë vazhdon dhe funksionimi i demokracisë do të vazhdojë. Sot duke respektuar Kushtetutën dhe mandatin tim, pas mocionit të mosbesimit jam i detyruar për të filluar konsultat me partitë politike për hapat e mëtutjeshëm të funksionimit të institucioneve të Kosovës. Sot kam takuar kryetarin e VV-së, Albin Kurti, kryetarin e LDK-së, Isa Mustafa dhe kryetarin e PDK-së, Kadri Veseli. Nesër do t’i takojë edhe liderët tjerë, liderët e AAK-së, Nismës dhe përfaqësuesit e Listës Serbe dhe Gjashtë Plus, në mënyrë që të krijojë një bazë të opinioneve, apo të formësoj veprimet e ardhshme që duhet t’i ndërmarr si president”, tha presidenti.
Tutje, presidenti Thaçi tha se bazë e veprimeve të tij do të jetë respektimi i Kushtetutës dhe praktikat e mëhershme, por duke pasur parasysh edhe mocionin e mosbesimit.
“Bazë e ime do të jetë respektimi i legjitimitetit të plotë të zgjedhjeve të 6 tetorit mirëpo duke marrë parasysh edhe mocionin. Të gjitha veprimet e mëtutjeshme që do të ndërmarr do të jenë transparente mirëpo edhe në përputhje me Kushtetutën dhe në përputhje me praktikat e mëhershme. Pra do jetë një proces i konsultuar, kushtetues dhe ligjor”, ka thënë presidenti.
Ndryshe, kryeministri në detyrë i Kosovës, Albin Kurti pas takimit që ka pasur sot me presidentin Thaçi ka thënë se zgjedhjet në Kosovë duhet të jenë opsion i vetëm pas mocionit të mosbesimit dhe se çdo alternativë tjetër sipas tij nuk është në përputhje me dispozitat kushtetuese.
