Turqia kundërshton kategorikisht çdo ndërhyrje ushtarake dhe çdo skenar lufte në rajon dhe është e gatshme të luajë rolin e ndërmjetësit mes Iranit dhe Shteteve të Bashkuara për të ulur tensionet. Këtë e ka deklaruar presidenti turk Recep Tayyip Erdogan në një intervistë për gazetën saudite Asharq al-Awsat, gjatë vizitës së tij në Riad.
Erdogan theksoi se Ankaraja është kundër çdo lufte të re apo vale të re shkatërrimi në rajon.
“Si Turqi, ne kundërshtojmë kategorikisht një luftë të re ose një valë të re shkatërrimi në rajonin tonë”, u shpreh ai, duke shtuar se Turqia e ka shprehur vazhdimisht kundërshtimin e saj ndaj çdo ndërhyrjeje ushtarake kundër Iranit në çdo forum ndërkombëtar.
Presidenti turk u bëri thirrje palëve të tregojnë përmbajtje dhe të shmangin çdo veprim që mund të rrisë tensionet. Ai theksoi se Turqia po ndjek nga afër zhvillimet në Iran, i jep rëndësi paqes dhe stabilitetit të vendit dhe nuk mbështet asnjë ndërhyrje të jashtme që mund të shkaktojë vuajtje për popullin iranian.
Erdogan nënvizoi gjithashtu se Turqia është e gatshme të marrë përsipër një rol ndërmjetësues mes Iranit dhe SHBA-ve, me synimin për të ulur tensionet dhe për të kontribuar në zgjidhjen e problemeve përmes mjeteve diplomatike. Sipas tij, përpjekjet diplomatike të Ankarasë në këtë drejtim po vazhdojnë.
Ai vuri në dukje edhe konsultimet dhe koordinimin që Turqia po zhvillon me vendet e rajonit, duke theksuar se rajoni nuk ka nevojë për ndarje të reja, por për bashkëpunim të bazuar në mençuri të përbashkët dhe përgjegjësi të ndarë.
“Qëllimi ynë nuk është të menaxhojmë konfliktet, por të forcojmë themelet diplomatike që i parandalojnë ato që në fillim. Për këtë arsye, do të ishte e dobishme krijimi i mekanizmave të sigurisë rajonale”, përfundoi Erdogan.
