Presidenti kinez Xi Jinping ka pritur sot, 4 dhjetor, homologun e tij francez, Emmanuel Macron.
Gjatë takimit në Pekin, Xi ka theksuar rëndësinë e bashkëpunimit të hapur mes Kinës dhe Francës, duke i përshkruar si dy shtete të mëdha, të pavarura dhe të përgjegjshme, që luajnë rol konstruktiv në mbështetjen e solidaritetit global dhe bashkëpunimit ndërkombëtar.
“Ne jemi të gatshëm të punojmë me Francën për të thelluar partneritetin strategjik të përbashkët dhe për të kontribuar në një botë multipolare, drejt një globalizimi ekonomik përfshirës dhe të dobishëm për të gjithë”, tha Xi.
Katër fusha kryesore të bashkëpunimit
Forcimi i besimit politik të ndërsjellë.
Zgjerimi i bashkëpunimit praktik, përfshirë tregtinë dhe investimet.
Promovimi i shkëmbimeve kulturore dhe njerëz-për-njerëz.
Përmirësimi dhe reforma e sistemit të qeverisjes globale.
Sipas zëdhënëses së Ministrisë së Jashtme kineze, Mao Ning, të dyja vendet do të mbështesin njëra-tjetrën për interesat dhe çështjet e tyre kryesore, duke siguruar një mjedis biznesi të drejtë, transparent dhe të parashikueshëm për kompanitë e dy vendeve.
Gjatë fjalës së tij në Këshillin e Biznesit Kinë-Francë, Xi nënvizoi se dy vendet po zgjerojnë bashkëpunimin ekonomik dhe tregtar. Ai theksoi gjithashtu rëndësinë e risjelljes së frymës së marrëdhënieve diplomatike dhe përdorimit të mundësive për të thelluar bashkëpunimin.
Macron, nga ana tjetër tha se do të diskutojë me Xi çështje si paqja dhe balancimi ekonomik, duke shtuar se Franca është e vendosur të punojë me Kinën dhe partnerët e tjerë globalë në sfidat kryesore të botës. Ai theksoi rëndësinë e bashkëpunimit mes Kinës dhe BE-së, ndërsa BE-ja së fundmi lançoi një plan 3 miliardë euro për të zvogëluar varësinë e saj nga Kina për minerale kritike.
Gjatë vizitës 3-ditore, Macron do të takohet edhe me Kryeministrin kinez Li Qiang dhe ligjvënës të lartë Zhao Leji, si dhe do të shoqërohet nga Xi në qytetin jugperëndimor Chengdu për bisedime mbi marrëdhëniet dypalëshe, tregtinë, tarifat amerikane, si dhe konfliktet në Ukrainë dhe Gaza.
Edhe Tajvani në fokus
Vlen të theksohet se Kina po kërkon mbështetje nga Franca, një nga pesë anëtarët e përhershëm të Këshillit të Sigurimit të Kombeve të Bashkuara, sa i takon mosmarrëveshjes me Japoninë mbi statusin e Tajvanit. Tensionet janë rritur pas deklaratave të Kryeministres japoneze, Sanae Takaichi, muajin e kaluar, e cila sugjeroi se një konflikt për Tajvanin mund të paraqesë një kërcënim ekzistencial për Japoninë.
Në prag të takimit Macron-Xi, Ministri i Jashtëm kinez, Wang Yi, i tha homologut të tij francez, Jean-Noël Barrot, se si fitues të Luftës së Dytë Botërore, Kina dhe Franca nuk duhet të lejojnë që Japonia të “krijojë trazira” rreth Tajvanit ose të përsërisë gabimet historike.
