Në Podujevë ka nisur faza e re e investimeve për rikonstruktimin e stadiumit “Zahir Pajaziti”, një projekt me vlerë dy milionë euro dhe i cili pritet ta transformojë këtë arenë sportive në një objekt modern dhe të përshtatshëm për ndeshje të nivelit ndërkombëtar.
Në ceremoninë e vendosjes së gurthemelit morën pjesë kryeministri në detyrë i Republikës së Kosovës, Albin Kurti, ministri në detyrë i Ministrisë për Kulturë, Rini dhe Sport, Hajrulla Çeku dhe kryetari i Komunës së Podujevës, Shpejtim Bulliqi.
Kurti e vlerësoi projektin si një investim të dobishëm dhe të domosdoshëm për zhvillimin e sportit, duke nënvizuar se infrastruktura e re do të ndihmojë në zbulimin dhe rritjen e talenteve të reja.
Ai theksoi se mbulimi i tribunës lindore, së bashku me tre tribunat ekzistuese, si dhe instalimi i kulmeve rreth e rrotull stadiumit, do ta kompletojë plotësisht objektin. Kurti shtoi se edhe ndriçimi i ri, i cili do të jetë sipas standardeve ndërkombëtare, do ta shndërrojë stadiumin “Zahir Pajaziti” në një arenë që i plotëson kriteret e UEFA-s.
“Përveç që e kemi obligim, besoj që është tejet e dobishme, sepse investimi në sport e posaçërisht në futboll në këtë stadium këtu në Podujevë, do të inkurajojë, do të zbulojë e do të ushqejë talente të reja, të cilët në vitet në vijim natyrisht që do ta ngritin lart e më lart futbollin e vendit tonë dhe të sportit në përgjithësi. Siç mund ta shihni, këtu janë tre tribunat, perëndim, veri dhe jug, dhe vendosja e gurthemelit për tribunat e lindjes praktikisht e kompleton këtë stadium. Dhe kur i shtojmë edhe kulmet e ulura që do të jenë rreth e rrotull, e gjithashtu edhe ndriçimi sipas standardeve ndërkombëtare, e shndërrojnë stadiumin Zahir Pajaziti në stadium sipas kritereve të UEFA-s, e që natyrisht do të jetë një shtysë më shumë për suksese edhe më të mëdha”, theksoi Kurti.
Nga ana tjetër, kryetari Shpejtim Bulliqi tha se ky projekt e çon stadiumin drejt kategorisë së tretë të UEFA-s, falë mbulimit të plotë të tribunave dhe ndriçimit modern që do të instalohet. Sipas tij, rikonstruktimi i ka dhënë mundësi finalizimit të të gjitha punëve të rëndësishme që i duhen stadiumit për t’u konsideruar një objekt i standardizuar sipas kërkesave evropiane.
“Një projekt i cili faktikisht po e krijon mundësinë e finalizimit të gjithë punëve në këtë stadium, për arsye se thashë do ta kemi mbulojë në të gjitha anët e stadiumit, dhe është ndriçimi publik që faktikisht është me standardet e UEFA-s dhe i plotëson të gjitha kriteret e stadiumit të kategorisë së tretë”, deklaroi Bulliqi.
Me këto investime, stadiumi “Zahir Pajaziti” pritet të bëhet një prej impianteve më bashkëkohore në vend, duke krijuar kushte shumë më të mira për KF Llapin dhe për komunitetin sportdashës të Podujevës, si dhe duke hapur mundësi për organizimin e ndeshjeve ndërkombëtare në të ardhmen.
Ndryshe, Kurti dhe Çeku vizituan dhe panë nga afër edhe punimet në pishinën gjysmë-olimpike që po ndërtohet gjithashtu në qytetin e Podujevës.
