Në prag të ashpërsimit të ligjit mi natyralizimin që hyn në fuqi më 1 janar 2018, Kantoni i Cyrihut regjistron një shtim prej rreth një të tretës të numrit të kërkesave të të huajve për të marrë pasaportën zvicerane.
Sigurisht, nisur nga vet paralejmërimi për ashpërsim por dhe nga masat që kishte marrë kantoni për sensibilizimin e të haujve që i plotësojnë krieteret, ishte pritur një rritje.
“Fakti se tash ka më tepër kërkesa, është normal”, ka thënë për radion SRF shefja e sektorit të natyralizimit, Sarah Notter. Por, se do të ketë një rritje për më shumë se një të tretën, nuk ka llogaritur askush.
Ndërkaq për përpunimin e kërkesave shtesë, Sarah Notter ka punësuar për dy vitet e ardhshme në mënyrë të veçantë një nëpunës më tepër. Por as kjo nuk është garanci se puna do të shkojë shpejt, pra kërkuesit luten që edhe më tej të kenë durim. “Secili kërkues merr nga ne vërtetimin për nisjen e procedurës”: dhe, të gjitha kërkesat që në Zyrën Kantonale për Natyralizim arrijnë deri më 31.12.2017, do të trajtohen sipas ligjit të vjetër.
Megjithatë, sipas Sarah Notter ende nuk mund të dihet nëse për shkak të shtimit të kërkesave do të ketë edhe më shumë natyralizime, transmeton albinfo.ch. Ajo llogarit se nisur nga numri i rritur i kërkesave do të ketë rritje edhe të numrit të hedhjes poshtë të tyre.
Siç është shkruar tashmë, me ligjin e ashpërsuar për natyralizimin, kërkohet plotësimi i më shumë kritereve se sa deri më tash për të fituar pasaportën zvicerane. Ndryshimi më i madh qëndron në atë se nga 1 janari 2018 e tutje këtë kërkesë mund ta bëjnë vetëm ata të huaj që kanë vizën C./Albinfo.ch/
