Kina bëri të ditur sot se 14 persona tjerë kanë vdekur të dielën nga koronavirusi, ndërsa 16 raste të reja u raportuan në të njëjtën ditë.
Komisioni Kombëtar i Shëndetit i Kinës tha se numri i vdekjeve arriti në 3,213, ndërsa numri i të infektuarve nga virusi i njohur si COVID-19 arriti në 80.860, raportoi agjencia e lajmeve Xinhua.
Sipas Organizatës Botërore të Shëndetësisë, e cila e shpalli shpërthimin një pandemi, numri global i vdekjeve është rritur në afër 5.800, me 153.648 raste të konfirmuara në të gjithë botën.
Zyrtarët shëndetësorë të Kinës shtuan se të gjitha vdekjet ndodhën në provincën Hubei, vatra e infeksionit.
Qendrat për Kontrollin dhe Parandalimin e Sëmundjeve në Korenë e Jugut tha se vendi po dëshmon një ngadalësim të rasteve të reja.
Sipas agjencisë Yonhap, gjithsej 8,236 persona u infektuan nga virusi në këtë vend duke përfshirë 74 raste të reja të zbuluara të dielën, theksuan të hënën zyrtarë shëndetësorë.
Deri më tani, 76 persona kanë vdekur nga COVID-19 në Korenë e Jugut.
Zyrtarët japonezë të Ministrisë së Shëndetësisë theksuan se numri i personave të infektuar ka arritur në 1.500, përfshirë rreth 700 raste të cilat ishin në anijen “Diamond Princess” të goditur nga virusi.
