“Ushtria e popullit tonë është një ushtri e pamposhtur dhe e fuqishme me aftësi të forta luftarake të afta për t’iu përgjigjur çdo lufte”, shkroi Rodong Sinmun, gazeta zyrtare e Partisë së Punëtorëve të Koresë së Veriut, në një lajm të publikuar në përvjetorin e themelimit të ushtrisë së vendit.
Në lajm thuhet se Koreja e Veriut kërcënon vendet provokuese, duke deklaruar se do të kryejnë sulmin e parë madje ndaj “provokimit më të vogël” dhe t’i ndëshkojnë “ashtu siç e meritojnë”.
Ceremonia e ekspozimit të raketave të reja në janar
Në Korenë e Veriut më 15 janar u mbajt një paradë ushtarake ku u shfaqën raketat e reja të cilat janë të afta të nisen nga nëndetëset.
Sipas lajmit të Agjencisë Qendrore Koreane të Lajmeve (KCNA), raketat e reja balistike të ekspozuara në ceremoninë e mbajtur në sheshin Kim Il-sung, të ndjekur edhe nga udhëheqësi i Koresë së Veriut Kim Jong, u përshkruan si “arma më e fuqishme në botë”.
Në ceremoni morën pjesë mijëra ushtarë dhe civilë dhe u ekspozuan armë me karburant të ngurtë që mund të lëshohen nga automjetet tokësore, të afta për të goditur objektiva në Korenë e Jugut dhe në Japoni.
Ekspertët ceremoninë, ku u ekspozuan raketa dhe armë të rënda, e interpretuan si një shfaqje e fuqisë kundër administratës së re amerikane të presidentit Joe Biden, i cili mori detyrën më 20 janar.
Udhëheqësi i Koresë së Veriut në Kongresin e Tetë të Partisë Koreane të Punëtorëve kërcënoi të forcojë arsenalin bërthamor duke publikuar një listë të sistemeve të teknologjisë së lartë të armëve të cilat janë në zhvillim.
