Ditën e sotme do të mblidhet Konferenca e Kryetarëve për të nisur procedurën e posaçme për zgjedhjen e Presidentit të ri të Republikës.
Mbledhja pritet të zhvillohet në orën 12:30.
Deri më tani është e paqartë me kë do të përfaqësohet grupi parlamentar i PD-së. Kujtojmë që në Kuvendin e 30 Prillit, Enkelejd Alibeaj u shkarkua nga kjo detyrë.
Por vetë Alibeaj ka thënë se nuk e njeh Kuvendin që u zhvillua të shtunën.
Ndërkohë socialistët kanë nisur të skicojnë konturet e profilit të kandidatit për President.
Ajo që është e qartë është se nuk do të jetë politikan aktiv dhe aq më pak nga radhët e grupit parlamentar socialist.
Në mbledhjen e Kryesisë, të mërkurën e shkuar anëtarët e këtij forumi të shumicës dhanë propozimet e tyre për fushat ku do të kërkohet kandidati President.
Diplomacia, akademia e shkencave, por dhe nga radhët e ushtarakeve me grada ishin propozimet më të shpeshta.
Po ashtu, ditën e sotme, Kryesia e Partisë Socialiste do të zhvillojë një tjetër mbledhje.
