Kina i ka bërë thirrje Ukrainës dhe Rusisë që të rifillojnë shpejt eksportet e grurit pas tërheqjes së Rusisë nga marrëveshjA ndërkombëtare që lehtëson eksportet bujqësore.
Zëvendëspërfaqësuesi i përhershëm i Kinës në Kombet e Bashkuara, Geng Shuang, bëri thirrje të premten për rifillimin e shpejtë të eksporteve të grurit dhe plehrave kimike nga Rusia dhe Ukraina në Këshillin e Sigurimit të OKB-së.
“Pekini shpreson se do të punohet me organet e OKB-së për të gjetur një zgjidhje të ekuilibruar për shqetësimet legjitime të të gjitha palëve”, tha Geng në takimin në Nju Jork.
Ai tha se kjo ishte e nevojshme për të garantuar sigurinë ndërkombëtare të ushqimit.
Rusia nisi pushtimin e saj në shkallë të plotë të Ukrainës në shkurt 2022 dhe bllokoi portet e Detit të Zi thelbësor për eksportin e grurit ukrainas.
Ukraina, e njohur si shporta e bukës së Evropës, është ndër furnizuesit kryesorë në botë të grurit dhe shumë vende varen nga eksportet e saj.
Rusia dhe Ukraina ranë dakord më pas për kushtet për të lejuar vazhdimin e eksporteve, në një marrëveshje të ndërmjetësuar nga OKB-ja dhe Turqia.
Megjithatë, marrëveshja përfundoi javën e kaluar pasi Moska këmbënguli për plotësimin e disa kushteve dhe lehtësimin e sanksioneve.
Bashkimi Evropian, i cili mbështet marrëveshjen e eksportit të grurit të Ukrainës, tha se gruri dhe plehrat kimike ruse janë të përjashtuara nga sanksionet dhe shumë banka janë ende të lidhura me “Swift”
