Shqipëria pjesë e programit të Bashkimit Evropian “Evropa Digjitale”

Shqipëria synon të bëhet pjesë e programit të Bashkimit Evropian “Evropa Digjitale”, që do të zbatohet deri në vitin 2027.

Zëvendësministrja e Infrastrukturës dhe Energjisë, Enkelejda Muçaj tha se, pjesëmarrja e vendit tonë në këtë program është një mundësi shumë e mirë përfitimi për të gjitha entitetet ligjore, si nga sektori publik (në nivel qendror dhe vendor), nga sektori privat apo industria që vepron në fushën e transformimit digjital.

Muçaj tha se, “pjesëmarrja në këtë program do të shoqërohet me efekte financiare për pagesën e një kontributi operacional dhe një tarife pjesëmarrjeje, me vlerë 270-300 mijë euro në vit, deri në vitin 2027, që do të mbulohet nga buxheti i shtetit”.

Nga ana tjetër, vijoi ajo, kjo marrëveshje do të mbështesë me një vlerë prej më shumë se 7 miliardë euro për të gjithë ato subjekte private, publike, ente dhe qytetar që do të donin të kishin mbështetje për 4 objektiva që parashtron “Evropa Digjitale”, ku përfshihen përpunimi kompjuterik me performancë të lartë; Inteligjenca artificiale, të dhënat dhe cloud; Aftësitë digjitale të avancuara, si dhe përshpejtimi i përdorimit sa më të mirë të teknologjive digjitale.

Muçaj theksoi se, pjesëmarrja e Shqipërisë në këtë program shërben si bazë e transformimit dixhital të ekonomisë dhe shoqërisë duke kontribuuar në zhvillimin ekonomik.