Policia e kryeqytetit ka proceduar në gjendje të lirë 12 persona pas protestës së të martës në Bashkinë e Tiranës. Policia thotë se disa prej tyre akuzohen për prishje të rendit dhe qetësisë publike ndërsa një tjetër për thirrje publike për veprime të dhunshme.
“Drejtoria Vendore e Policisë Tiranë, në lidhje me aktet e dhunshme të ushtruara gjatë protestës së zhvilluar ditën e djeshme, përpara Bashkisë Tiranë, nga Aleanca për Mbrojtjen e Teatrit, në vijim të veprimeve hetimore e procedurale dhe nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, procedoi në gjendje të lirë shtetasit: D. B., 27 vjeç, R. D., 19 vjeç, A. P., 46 vjeç, K. B., 21 vjeç, S. L., 68 vjeç, S. B., 48 vjeç, G. S., 53 vjeç, B. Xh., 34 vjeç, E. K., 22 vjeç, T. B., 39 vjeç, K. B., 34 vjeç, të gjithë banues në Tiranë, për veprat penale “Prishja e qetësisë publike” dhe “Shkatërrimi i pronës”; A. K., 59 vjeçe, banuese në Tiranë, për veprën penale “Thirrjet publike për veprime të dhunshme”, njoftoi policia.
Kujtojmë se ditën e djeshme u zhvillua protesta e radhës para Bashkisë së Tiranës. Ata kërkojnë largimin e kryebashkiakut Erion Veliaj pas arrestimit të disa zyrtarëve dhe ish-zyrtarëve të institucionit që ai drejton. Protestuesit kanë përdorur molotov, kanë hedhur sende drejt godinës si dhe kanë shkatërruar gardhin metalik të vendosur nga policia.
