Vala e re e shpërthimeve të pajisjeve të radio-komunikimit që goditi Libanin sot ka vrarë të paktën 14 persona dhe ka plagosur më shumë se 450 të tjerë, tha Ministria e Shëndetësisë e vendit.
Kjo është dita e dytë radhazi e incidenteve të tilla, ku deri më tani kanë vdekur gjithsej 26 persona dhe janë plagosur mbi 3.000.
Më herët, Agjencia Kombëtare e Lajmeve e Libanit raportoi se tre persona u vranë nga shpërthimet në qytetin Sohmor, në jug të Libanit.
Agjencia e lajmeve tha se pajisjet e radio-komunikimit shpërthyen gjithashtu në duar të përdoruesve në qytetin jugor të Libanit, Tyre.
Sipas korrespondentit të Anadolus, shpërthime u dëgjuan në Bejrutin jugor dhe disa qytete jugore, duke rezultuar në zjarre që përfshinë makina dhe apartamente banimi.
Më herët sot, ministri i Shëndetësisë Firas Alabiad njoftoi se numri i të vdekurve nga shpërthimet e djeshme të pajisjeve “pager” në Liban është rritur në 12, duke përfshirë dy fëmijë.
“Numri i personave të plagosur varion midis 2.750 dhe 2.800, me rreth 300 të raportuar në gjendje kritike”, shtoi Alabiad në një konferencë shtypi në Bejrut.
Burime libaneze të sigurisë kanë thënë se agjencia izraelite e spiunazhit Mossad ka vendosur eksplozivë brenda pajisjeve të përdorura nga anëtarët e Hezbollahut disa muaj më herët. AA
