Kryeministri Edi Rama mori fjalën e tij në Forumin e Paqes në Paris, nismë e presidentit Emmanuel Macron, ku personalitete nga e gjithë bota diskutojnë rreth bashkëpunimit ndërkombëtar dhe mënyrave për të promovuar paqen.
Rama foli për projektin e Bashkimit Europian, duke u shprehur se BE është projekti më i jashtëzakonshëm i njerëzimit. Kreu i qeverisë shtoi se Shqipëria në BE do ishte një bekim. Ai tha se Shqipëria, përpos se po bën hapa përpara në integrim, gjithashtu mban raporte të mira me fqinjët. Rama shtoi se me Serbinë ka një problem dhe ai është Kosova, që Shqipëria dhe shtetet e zhvilluara e njohin si të pavarur.
Kritika e Ramës: Europa duhet të ketë një plan për paqen
Rama kritikoi mungesën e një vizioni të qartë të Bashkimit Evropian për zgjidhjen e konflikteve dhe nënvizoi se kontinenti po mbetet pasiv në skenën ndërkombëtare. “Unë nuk po e shoh Europën të zgjohet, nuk është aty ku duhet të jetë”, tha ai. Kreu i qeverisë shtoi se BE-ja ende nuk ka një plan për paqen.
Ai paralajmëroi se mungesa e këtij plani e bën Evropën më të dobët dhe theksoi rëndësinë e diplomacisë së përditshme. “Ndihem i shqetësuar për diplomacinë dhe planifikimin për paqen”, u shpreh Rama.
Duke folur për konfliktet aktuale, ai tha se është e qartë se Rusia ka ambicie luftarake. “Që Putini do luftë është e qartë çdo ditë”, deklaroi Rama. Kryeministri theksoi nevojën që Evropa të ketë autonominë e vet në politikën e jashtme. “Europa duhet të ketë autonominë e saj, politikën e saj të jashtme, planin e saj të paqes”, shtoi ai.
Rama i bëri thirrje Evropës të veprojë pa frikë dhe të mos lërë pas dore planet për paqen. “Bëje luftën, por duhet të mendohet për paqen”, tha kryeministri.
Ai gjithashtu apeloi për reflektim dhe për një qasje më përulëse ndaj sfidave ndërkombëtare. Gjithsesi, Rama shprehu besimin se projekti i Bashkimit Evropian është ndër më të shkëlqyerit.
Rama: Çdo marrëveshje mes SHBA-së dhe Kinës, lajm i mirë për botën
Kryeministri Edi Rama foli edhe për takimin e presidentit amerikan Donald Trump me homologun e tij kinez, Xi Jinping.
Rama theksoi se SHBA-ja dhe Kina janë superfuqi botërore dhe se çdo marrëveshje mes tyre, është lajm i mirë për globin.
“Unë besoj se çdo marrëveshje mes SHBA-së dhe Kinës është mirë për të gjithë dhe çdo konflikt mes tyre është problem për të gjithë. Ata po takohen për një marrëveshje tregtare. E dini atë shprehjen, që kur SHBA teshtin, bota trembet, kur Kina teshtin, bota futet në karantinë”, deklaroi Rama.
