Kryeministri britanik Keir Starmer ka deklaruar se disa protesta pro-Palestinës mund të ndalohen dhe se personat që përdorin shprehjen “Ta zgjerojmë rezistencën” mund të përballen me ndjekje penale.
Në një intervistë për BBC, Starmer theksoi se, megjithëse mbështet lirinë e shprehjes dhe të drejtën për protesta paqësore, ka kufij kur bëhet fjalë për slogane që ai i konsideron të papranueshme.
Ai tha se përdorimi i shprehjeve si “Ta zgjerojmë rezistencën” është “plotësisht i papranueshëm” dhe shtoi se duhet të ketë masa më të forta ndaj tyre. Sipas tij, autoritetet britanike kanë qenë prej kohësh në diskutime me policinë për mënyrat e mundshme të ndërhyrjes më të ashpër në protesta të tilla.
Starmer gjithashtu la të kuptohet se në disa raste, ndalimi i plotë i tubimeve mund të jetë i justifikuar. Ai theksoi se nuk bëhet fjalë për kufizim të përgjithshëm të protestave, por për raste specifike ku, sipas tij, ka nxitje të gjuhës së urrejtjes.
Deklaratat e tij vijnë pas kritikave të shumta për rritjen e incidenteve antisemitike në Britani, përfshirë një sulm me thikë në veri të Londrës. Pas këtij incidenti, policia britanike ka rritur nivelin e alarmit të sigurisë në “të lartë”.
Komisioneri i Policisë Metropolitane, Sir Mark Rowley, ka deklaruar gjithashtu se personat që përdorin sloganin në fjalë “ka gjasa të arrestohen”. Ndërkohë, mbështetësit e këtij slogani argumentojnë se ai përfaqëson zgjerimin global të lëvizjes pro-Palestinë.
Qeveria britanike po përballet me kritika nga aktivistë të të drejtave të njeriut, të cilët pretendojnë se masa të tilla mund të kufizojnë lirinë e shprehjes dhe të protestës në vend.
