Dita Botërore e Shkencës për Paqen dhe Zhvillimin shënohet çdo vit më 10 nëntor dhe synon të evidentojë rolin e rëndësishëm të shkencës në shoqëri, si dhe nevojën për përfshirjen e publikut në diskutimet mbi zhvillimet dhe sfidat e reja shkencore.
Kjo ditë vë theksin te rëndësia e shkencës në jetën e përditshme dhe nxit afrimin e saj me shoqërinë, duke informuar qytetarët mbi përparimet shkencore dhe kontributin e studiuesve në kuptimin dhe mbrojtjen e planetit, si dhe në ndërtimin e shoqërive më të qëndrueshme.
Nisma synon të përfshijë aktorë të ndryshëm, nga institucionet shtetërore dhe mediat deri te nxënësit, përmes organizimit të aktiviteteve që promovojnë shkencën si një instrument në shërbim të paqes dhe zhvillimit.
Për herë të parë, në vitin 1986, në kuadër të Vitit Ndërkombëtar të Paqes, u shënua dhe Java Ndërkombëtare e Shkencës dhe Paqes, që zhvillohet çdo vit gjatë javës ku përfshihet data 11 nëntor. Kjo javë synon të promovojë lidhjen mes përparimit të shkencës dhe teknologjisë dhe ruajtjes së paqes e sigurisë. Ajo nxit bashkëpunimin ndërkombëtar mes shkencëtarëve, shkëmbimin akademik dhe ndërgjegjësimin e publikut për rolin që ka shkenca në ndërtimin dhe ruajtjen e paqes.
Përmes aktiviteteve të organizuara çdo vit, kjo nismë kontribuon në forcimin e mirëkuptimit ndërkombëtar dhe krijimin e mundësive të reja për bashkëpunim shkencor në shërbim të paqes.
