Prokuroria Themelore në Mitrovicë – Departamenti i Përgjithshëm, ka ngritur aktakuzë, në Gjykatën Themelore në Mitrovicë – Dega Skenderaj, kundër të pandehurve M.I, F.H, H.F dhe B.H në drejtim të veprave penale “Mashtrim”, si dhe “Falsifikimi i dokumenteve’’.
Prokuroria njofton se të pandehurit, në fillim të vitit 2018 me qëllim të përfitimit të kundërligjshëm të dobisë pasurore, kanë paraqitur fakte të rreme duke lëshuar certifikata dhe vërtetime të veteranëve të luftës.
Po ashtu, të dyshuarit e lartëcekur kanë përpiluar dokumentacionin-certifikatat dhe vërtetime të veteranëve në emër të këtyre personave me qëllim të shfrytëzimit të këtyre dokumenteve si origjinale.
Të njëjtit me këto veprime kanë dëmtuar rreth 60 persona, me ç`rast për një veprim të tillë kundërligjshëm kanë përfituar deri në 2500 euro.
Prokurori i Shtetit, i ka propozuar gjykatës, që të pandehurit t’i shpallë fajtorë për veprat e kryera penale dhe t`i dënojë sipas ligjit./KK
