59% të zviceranëve janë kundër organizimit të Olimpiadës “Sion 2026”

Organizimi i Lojërave Olimpike Dimërore në Zvicër, gjegjësisht Olimpiada “Sion 2026”, nga fillimi ka pasur kundërshtarë të shumtë. Së fundi këtë e dëshmon edhe një sondazh i madh i publikuar sot në gazetat “SonntagsZeitung” dhe “Le Matone dimanche”. 17067 veta janë pyetur nëse janë pro ose kundër kësaj olimpiade.

59 për qind janë shprehur në mënyrë të vendsour kundër ose më shumë kundër se pro, projektit “Sion 2026”. Ndërkaq 36% janë pro ose më shumë pro se kundër këtij projekti të madh.

Në përgjithësi 60 për qind të të anketuarve kanë rezerva parimore kundër manifestimeve të mëdha të këtij lloji. 65% janë kundër që shteti zviceran ta mbështesë këtë organizim me një miliard franga.

Qytetarët me të drejtë vote të Kantonit të Valisit, ku pritet të mbahet olimpiada, më 10 qershor do të votojnë për lejimin e një kontributi prej maksimalisht 100 milionë frangash që kantoni i tyre do ta jepte për projektin./Albinfo.ch/