Krerët e Bashkimit Evropian kanë vendosur të takohen të enjten në Bruksel për dy ditë për të diskutuar mbi tensionet në Mesdheun Lindor dhe marrëdhëniet me Turqinë.
Presidenti i Këshillit Evropian, Charles Michel të martën u dërgoi një letër udhëheqësve të BE-së për të përshkruar objektivat e Samitit.
Ai tha se fokusi kryesor i takimit do të jetë në marrëdhëniet me Turqinë mbi tensionet e fundit në Mesdheun Lindor, por gjithashtu marrëdhëniet BE-Kinë, helmimin e Alexei Navalny-t, situatën në Bjellorusi dhe përshkallëzimin e fundit në Malësinë e Karabakut të pushtuar nga armenët.
Udhëheqësit e BE-së po ashtu do të diskutojnë mbi pandeminë e re të koronavirusit dhe efektet e saj në ekonominë evropiane.
Nuk ka sanksione ndaj Bjellorusisë
Në takimin në fillim të këtij muaji për të diskutuar çështjet ndërkombëtare dhe Bjellorusinë, ministrat e Jashtëm të BE-së nuk ishin në gjendje të arrijnë marrëveshje mbi sanksionet ndaj këtij vendi.
“Ministrat diskutuan çështjen e sanksioneve dhe megjithëse ka një vullnet të qartë për të miratuar ato sanksione, nuk ka qenë e mundur të bëhej sot sepse unanimiteti i kërkuar nuk u arrit”, u tha gazetarëve shefi i politikës së jashtme të bllokut, Josep Borrell pas takimit të këshillit të Punëve të Jashtme të BE-së.
Ai tha se palët nuk mund të binin dakord gjatë takimit sepse administrata qipriote greke donte që ndëshkimet ndaj Bjellorusisë të lidheshin me sanksionet kundër Turqisë lidhur me mosmarrëveshjet mbi shpimet e gazit në Mesdheun Lindor.
Marrëdhëniet shumë-dimensionale
Javët e fundit, diplomatët e BE-së, duke folur në kushte anonimiteti, nënvizuan rëndësinë e marrëdhënieve shumë-dimensionale midis BE-së dhe Turqisë.
Diplomatët theksuan nevojën për të parë marrëdhëniet BE-Turqi nga një “perspektivë më e gjerë gjeopolitike” krahas kërkesave të Francës, Greqisë dhe administratës qipriote greke për një politikë më të ashpër dhe sanksione kundër Ankarasë.
Ata theksuan rëndësinë e bashkëpunimit me Turqinë, një vend kandidat për BE, në çështje të tilla si migrimi, tregtia, energjia dhe siguria, duke shprehur shqetësimin se përjashtimi i Turqisë mund të jetë në të mirë të Rusisë.
Shumë udhëheqës të BE-së kanë zgjedhur të përmirësojnë lidhjet me Turqinë, Rusinë dhe Kinën, duke marrë parasysh rritjen globale dhe rajonale të këtyre vendeve në vitet e fundit.
Borrell, në këtë pikë, i tha Parlamentit Evropian dy javë më parë se “perandoritë e vjetra po kthehen” dhe se kjo po krijonte një mjedis të ri.
“Perandoritë e vjetra po kthehen. Janë të paktën tre prej tyre. Mund të themi Rusia, Kina dhe Turqia, perandori të mëdha në të kaluarën. Ata po kthehen me një qasje në fqinjësinë e tyre të ngushtë dhe globalisht, e cila përfaqëson për ne një mjedis të ri. Turqia është një nga këta elementë që ndryshon mjedisin tonë”, tha ai.
Mosmarrëveshja mbi Mesdheun Lindor
Tensionet kanë ardhur duke u rritur për javë të tëra në Mesdheun Lindor, teksa Greqia ka kontestuar kërkimin e energjisë së Turqisë.
Turqia, vendi me vijën më të gjatë bregdetare në Mesdhe, dërgoi anije për të kërkuar energji në shelfin e saj kontinental, duke pohuar të drejtat e saj në rajon si dhe ato të Republikës Turke të Qipros Veriore.
Për të ulur tensionet, Ankaraja ka bërë thirrje për dialog për të siguruar ndarjen e drejtë të burimeve në rajon.
