Komisioni Zgjedhor ka numëruar mbi 90% të votave për Presidencialet në Maqedoninë e Veriut dhe sipas rezultatit të deritanishëm, 2 kandidatët më të votuar janë Gordana Siljanovska e VMRO-DPMNE dhe kreu aktual i shtetit, Stevo Pendarovski i mbështetur nga socialdemokratët në qeveri.
Opozitarja Godrana Siljanovska ka siguruar më shumë se 40% të votave, me një epërsi prej mbi 20% ndaj presidentit aktual. Sipas Kodit Zgjedhor, që një kandidat për president të sigurojë mandatin që në raundin e parë, ka nevojë për një mbështetje mbi 50%. Ashtu siç pritej, presidentin e Maqedonisë së Veriut do ta përcaktojë raundi i balotazhit të 8 Majit.
Mes dy kandidatëve shqiptarë, më i votuari është ministri i Jashtëm, Bujar Osmani. Ai siguroi 13.36% të votave dhe u rendit i treti, me 4% epërsi ndaj rivalit opozitar shqiptar, Arben Taravari. Pjesëmarrja në këto zgjedhje arriti në 48.47%, 5% më e lartë krahasuar me presidencialet e 5 viteve më parë, që për të parën herë u zhvilluan me votim popullor.
Më poshtë, rezultati i numërimit të votimeve në Maqedoninë e Veriut deri në orën 08:00:
Gordana Siljanovska Davkova – 362.682 | 40,08%
Stevo Pendarovski – 180.306 | 19,93%
Bujar Osmani – 120.903 | 13,36%
Maksim Dimitrievski – 83.787 | 9,26%
Arben Taravari – 83.356 | 9,21%
Biljana Vankovska Cvetkovska – 41.172 | 4,55%
Stevço Jakimovski – 8.103 | 0,90%
