Bakllavanë jemi mësuar që ta shijojmë gjatë festave të fundvitit, por kjo ëmbëlsirë e shijshme mund të jetë edhe pjesë e festave në familje.
Mënyrat e përgatitjes së saj ndryshojnë sipas krahinave, disa përdorin gjalpë, disa të tjerë vaj ulliri.
AgroWeb.org sot ju tregon recetën e qytetit të Vlorës për përgatitjen e delikatesës tradicionale.
Ndiqni hapat dhe shijojeni me të dashurit tuaj sa herë që nepsi ju kërkon diçka plot sherbet dhe me shije unike.
PËRBËRËSIT
Për brumin :
1 kg miell
9 vezë të plota
1 filxhan çaji vaj ulliri
ujë aq sa duhej që të lidhej brumi
pak uthull
një majë luge kripë e sheqer
niseshte për hapjen e petëve
1 kg gjalpë i shkrirë
Për mbushjen:
600-700 g arra të grira trashë të trazuara me 4-5 lugë sheqer e kanellë pluhur
Për sherbetin:
1.5 kg sheqer
700 ml ujë
2-3 shkopinj kanellë
2 lugë gjelle lëng limoni
PËRGATITJA
Pasi zihet brumi e lemë të çlodhet pak, rreth gjysmë ore dhe e ndajmë në 60-70 toptha të vegjël.
Numri i tyre është në varësi të diametrit të tepsisë që keni përzgjedhur.
Hapja e petëve është pjesa më e vështirë sepse mirë është të hapen një nga një.
AgroWeb.org ju sugjeron që të përdorni pak niseshte në mënyrë që petat të mos ngjiten apo grisen.
Pasi i hapim të gjitha petët, i lemë të thahen pak sa të përgatisim mbushjen me arra të trazuara me sheqer e kanellë e karafil pluhur.
Shtrojmë poshtë 15 petë pastaj në çdo 2 petë hedhim mbushje duke e përhapur në tepsi në mënyrë të njëtrajtshme.
Ky proces vazhdon derisa të na ngelen 15 petë te cilat i shtrojmë në fund.
Pasi kemi mbaruar e presim me një thikë të mprehtë në format e dëshiruara, romb, katror etj.
Sipër i hidhet gjalpi i shkrirë e i kulluar nga hirra. Futet në furrë në 140 gradë për rreth 4 orë.
Zihet shërbeti sa të lidhet. Për të kuptuar nëse sherbet është gati vendosim pak mbi një pjatë dhe nëse qëndron në vend pa rrëshqitur është gati nëse jo e ziejmë edhe për pak minuta.
Sherbetosim bakllavanë e ftohtë me sherbet të ngrohtë ose e kundërta bakllava e ngrohtë sherbet i ftohtë dhe është gati.
