TIRANË- Gjykata e Posaçme Kundër Korrupsionit dhe Krimit të Organizuar ka vendosur t’i revokojë masën e sigurisë “arrest në shtëpi” për ish-kryeministrin Sali Berisha.
Vendimi u caktua nga gjyqtarja Flojera Davidhi.
Lajmi u dha nga avokati i tij, Genc Gjokutaj, i cili tha se vendimi është i ekzekutueshëm dhe Berisha është i lirë, prej ditës së sotme.
“Gjykata konstatoi se për zotin Berisha nuk ekzistojnë më kushtet dhe kriteret për asnjë lloj mase. Ne kemi një vit e ca luftë me Irena Gjokën.
Qëndrimi i Strasburgut është determinant dhe ka një rol parësor në këtë punë. SPAK le të bëjë çfarë të dojë.
Por duhet të ulë kokën sepse i ka hipur një kali për sprapthi. Absolutisht i ekzekutueshëm, ai sot është i lirë. Mos u mërzisni pse u lirua Berisha”, tha ai.
Ish-kryeministri Sali Berisha qëndronte në masën e “arrestit shtëpiak” prej 30 dhjetorit 2023.
Kjo masë e dytë shtrënguese erdhi pasi ai nuk pranoi të zbatonte vendimin e parë të GJKKO-së për masën e sigurisë “detyrim me paraqitje”.
Gjykata Kushtetuese pak ditë më parë e cilësoi si kushtetuese masën “Detyrim paraqitje” që kishte caktuar GJKKO-ja, pavarësisht ankesës, që bëri mbrojtja e Sali Berishë në këtë organ.
