Presidenti i Afganistanit, Ashraf Ghani, ka përshëndetur “përparimin e dukshëm” të arritur në bisedimet e paqes në vazhdim midis SHBA-ve dhe talebanëve, (AA).
Ghani tha se sekretari amerikan i Shtetit, Mike Pompeo, e ka informuar atë nëpërmjet telefonit për propozimin e talebanëve “lidhur me reduktimin e konsiderueshëm dhe të qëndrueshëm të dhunës”.
“Ky është një zhvillim përshëndetës dhe unë jam i kënaqur që qëndrimi ynë kryesor për paqen deri më tani ka filluar të japë rezultate të frytshme. Qëllimi ynë kryesor është t’i japim fund gjakderdhjes së pakuptimtë”, shkroi Ghani në një postim në Twitter.
“Për ta bërë këtë, populli afgan qëndron me ne me konsensusin e plotë dhe e siguroj se udhëheqja e mban guximin, kompetencën dhe burimet e nevojshme për ta arritur këtë objektiv. Republika Islame e Afganistanit do të menaxhojë hapat e ardhshëm në një mënyrë që të mbështesë pozitivisht procesin e përgjithshëm të paqes dhe të raportojë para publikut”, shtoi Ghani, i cili më parë ishte i pakënaqur për shkak të mënjanimit në bisedime.
Duke u përpjekur për një marrëveshje të mundshme në Afganistan, pakti i propozuar i SHBA-ve dhe talebanëve varet shumë nga fakti nëse kryengritësit kalojnë njoftimin e një sulmi tjetër pranveror këtë vit, një diplomat perëndimor me qendër në Kabul deklaroi për AA.
Zhvillimi i fundit vjen pasi i dërguari i SHBA-ve, ambasadori Zalmay Khalilzad, i cili është përfaqësuesi special i Washingtonit për pajtim në Afganistan, përfundoi turneun e tij diplomatik në Pakistan dhe Afganistan këtë javë dhe u drejtua përsëri në Doha të Katarit për të vazhduar raundin maratonë të bisedimeve me talebanët pas dyerve të mbyllura.
Kur u kontaktua, zëdhënësi i talebanëve, Zabihullah Mujahed, për AA tha se ishte “shumë herët për të thënë diçka për ofensivën e pranverës”, duke shtuar se, “Do të vendosim për atë me kohë. Ka kohë”.
Në shtatorin e vitit të kaluar, presidenti i SHBA-ve, Donald Trump, anuloi marrëveshjen e propozuar të paqes me kryengritësit në minutën e fundit për shkak të vrasjes së një ushtari amerikan në kryeqytetin afgan, Kabul.
Sipas shifrave jo të klasifikuara nga Misioni i Mbështetjes Vendimtare të NATO-s, të paktën 20 ushtarë amerikanë janë vrarë në Afganistan në vitin 2019.
