Kryetari i Grupit Parlamentar të Partisë Socialiste Taulant Balla mori pjesë në ceremoninë e ditës së çlirimit të Elbasanit.
Balla në këtë ditë të shënuar për Elbasanin, shkruan se ky qytet ka dhënë kontributin e vet në çlirimin e vendit nga pushuesit nazi-fashistë.
Kujtojmë se, pas zgjedhjeve të 25 prillit kryeministri Edi Rama e largoi Ballën si drejtues nga ky qark duke e dërguar në Fier, ndërsa vendin e tij e mori ministrja e Arsimit, Evis Kushi.
Kryetari i Grupit Parlamentar të PS ka shpërndarë foto nga ceremonia, ku shihet krah kësaj të fundit!
Postimi i plotë i Ballës:
Elbasan GËZUAR DITËN E ÇLIRIMIT
Elbasani ka kontributin e vet në çlirimin e vendit nga pushtuesit nazi-fashistë. Lufta Partizane ishte e kristaltë, ka qenë luftë idealesh të pastra dhe është krenari për të gjithë Shqipërinë.
Në Luftën e Dytë Botërore, ne shqiptarët, ashtu si edhe popujt e tjerë të Europës dhe më gjerë, me luftën heroike partizane u angazhuam në një përpjekje të madhe, luftarake dhe të përgjakshme, si aleatë në krah të koalicionit të madh antifashist.
Nuk duhet harruar se Shqipëria jonë e vogël pagoi një çmim të jashtëzakonshëm gjaku dhe sakrificash të panumërta njerëzore. Nderimi i këtyre sakrificave është nderi i çdo gjenerate shqiptarësh. Prandaj nderimi i Luftës Antifashiste Nacionalçlirimtare, nderimi i dëshmorëve dhe heronjve të lavdishëm të Luftës Antifashiste Nacionalçlirimtare, nderimi i çdo faqeje të kësaj lufte dhe i vetë datës së çlirimit të vendit tonë, në 29 nëntor 1944, është nderi i çdo shqiptari.
Ka patur gjithmonë përpjekje në këto 30 vite për të hedhur baltë ndaj Luftës Antifashiste, ndaj dëshmorëve. Sakrifica e mijëra djemve dhe vajzave të Shqipërisë që ranë me një idealizëm të pashoq në luftën për çlirim as nuk mund të mohoehet, e padyshim meriton më tepër. Nuk duhet dhe nuk mund të ngatërrohet epopeja e Luftës Antifashiste Nacional Clirimtare me atë që pasoi pas vitit 1945.
