Përveç pandemisë së COVID-19, Bangladeshi po lufton edhe me ethet e dengit, një infeksion viral i përhapur nga mushkonjat që ka marrë 54 jetë në vendin e Azisë Jugore që nga janari, transmeton Anadolu Agency (AA).
Sipas Drejtorisë së Përgjithshme të Shërbimeve Shëndetësore, nga 54 vdekje nga ethet e dengit, 50 u regjistruan në kryeqytetin Dhaka.
“Në 24 orët e fundit, ethet e dengit kanë marrë një jetë tjetër dhe kanë infektuar 317 persona, duke e çuar numrin e përgjithshëm të të infektuarve në 13.007”, tha administrata në një deklaratë.
Nga numri i përgjithshëm i infeksioneve, 12.419 raste ose 95 për qind e rasteve u raportuan në Dhaka.
Për shkak të përhapjes së etheve të dengit, popullata po përpiqet të pastrojë shtëpitë, çatitë dhe oborret e tyre.
“Për shumë vite, Dhaka ka qenë vatra e etheve të dengit për disa arsye, të tilla si akumulimi i shiut, uji i ndenjur në kova plastike, vazot me lule dhe mbipopullimi”, tha për AA, Atiar Rahman nga Shkolla Mjekësore Bangabandhu Shejh Mujib.
Ai u bëri thirrje qytetarëve të kenë kujdes për ujin që qëndron kudo në shtëpitë dhe rrethinat e tyre, duke i këshilluar njerëzit që të përdorin rregullisht mjete kundër mushkonjave dhe rrjeteve.