Ish-kryeministri Sali Berisha ka komentuar hetimet e SPAK për Ilir Beqajn, ndërsa theksoi se ky i fundit do të përfitojë sërish një amnisti të tretë.
Pyetjes së gazetarit të Neës24, Osman Stafa mbi opsionin; “Nëse Rama do ta çonte në burg shokun e tij, Ilir Beqaj”, Berisha qeshi ndërsa shtoi se kjo ishte një shaka.
“Kjo është shaka! Kush ta tha. E sigurt që do të shkojë drejt amnistisë së tretë. Të mos bësh përgjegjës Ilir Beqajn, që ka emëruar kushëririn e tij të parë, në mos gaboj me mbiemër Byrazeri për të bërë studimin e fizibilitetit. Të mos bësh përgjegjës Beqajn që jashtë çdo tagri ligjor ka përcaktuar kompaninë fituese të Rrapajt. Rrapaj është njeri i Ramës 100%.”, tha ai.
Në një konferencë për mediat, Berisha tha se nuk ka asnjë krahasim mes arrestimit të Nanos dhe çështjes së tij apo të Jamarbër Malltezit.
“Fatos Nano është arrestuar për disa akuza të PS, të disa akuzave Shane Korbeci dhe disa ministra të tjerë që nuk kishin firmosur, njëri prej tyre Qemal Visha. Ishin zhdukur 10 mln ndihma humanitare për shqiptarët e uritur. Pa nam dhe nishan. E vërteta doli se Qemal Visha në atë kohë ministër nuk kishte firmosur. Nano nuk ka pasur asnjë akuzë të vetme nga qeveria e PD, se kanë qenë gati. Ai është pyetur. Janë në dosje akuzat e ministrave të tij. Të krahasosh 10 mln ndihma të zhdukura të shqiptarëve me 450 metra katrorë tokë të Jamarbër Malltezit, janë dy gjëra më të pakrahasueshme. Në dosjen e italianëve ishte firma e italianëve.”, tha ai.
