Moti i keq me reshje masive shiu ka përfshirë gjithë vendin, duke krijuar jo pak probleme.
Reshjet e dendura të ditës së djeshme kanë dëmtuar një pjesë të rrugës Sarandë-Borsh, duke krijuar edhe çarje të rrugës.
Nga shërbimet e Qarkullimit Rrugor në Komisariatin e Sarandës, bëjnë me dije se për këtë është njoftuar edhe ARRSH dhe firma e mirëmbajtjes së kësaj rruge.
Autoriteti Rrugor Shqiptar reagon për çarjen e rrugës në Borsh, si pasojë e reshjeve masive të shiut.
ARRSH iu bën thirrje gjithë drejtuesve të mjeteve të evitojnë kalimin në këtë aks, ndërsa njofton se specialistët ndodhen në vvendngjarje dhe po vlerësojnë situatën.
Reagimi i ARRSH:
Informacion për opinionin publik dhe median❗️ Në aksin Q. Llogarasë-Sarandë, në lagjen Vonja të Borshit, si pasojë e reshjeve me intensitet të lartë të ditëve të fundit, ka ndodhur një rrëshqitje, e cila ka dëmtuar trupin e rrugës.
Kompanitë e mirëmbajtjes dhe specialistët e ARRSH-së janë në vend për të vlerësuar situatën duke bërë në të njëjtën kohë edhe menaxhimin e trafikut vetëm në një kalim.
Lajmërohen të gjithë drejtuesit e automjeteve që të evitojnë kalimin në këtë aks, si dhe është ndaluar qarkullimi i mjeteve të rënda në këtë aks.
