A mund të zgjidhet konflikti ndërmjet Serbisë dhe Kosovës nëpërmjet një shkëmbimi territoresh? Ish-përfaqësuesi i veçantë i Organizatës së Kombeve të Bashkuara për Ballkanin, Carl Bildt, ka thënë, në një intervistë për gazetën gjermane Frankfurter Allgemeine Zeitung, se e konsideron këtë ide si iluzion.
Sipas Bildt, është iluzion të mendohet se mund të ketë shtete monoetnike.
Shkëmbimi i një zone në veri të Kosovës, me zonën e Preshevës dhe Bujanovcit, në jugun e Serbisë, do të prekte dhjetëra mijëra njerëz, ka thënë Bildt.
I pyetur nëse presidenti i Kosovës, Hashim Thaçi, dhe ai i Serbisë, Aleksandar Vuçiç, seriozisht duan një shkëmbim të tillë, Bildt ka thënë se po dëgjon “gjëra kundërthënëse”.
Sa më shumë detaje të ketë, aq më i vështirë bëhet realizimi i një plani të tillë, ka thënë Bildt për FAZ.
Bildt ka vlerësuar se “sistemi politik në Kosovë është shumë i përçarë, dhe se është e vështirë të aprovohet nga Kuvendi i Kosovës një plan që përfshin shkëputjen nga Kosova të veriut të saj”.
Sipas Bildt, fakti se Uashingtoni dhe pjesërisht Bashkimi Europian po e aprovojnë një zgjidhje të tillë, apo nuk po e kundërshtojnë atë, i inkurajon të gjithë politikanët në rajon, të cilët ëndërrojnë të krijojnë shtete monoetnike./Kosova Post/
