Qindra emigrantë që udhëtuan së bashku në një karvan janë penguar të hyjnë në Shtetet e Bashkuara të Amerikës.
Një nga organizatorët e udhëtimit, tha për BBC se asnjë në grup nuk i ishte nënshtruar procedurave zyrtare në doganën amerikane. Sipas Alex Mensing, rreth 50 persona janë ende në radhë për të marrë lejen e hyrjes ndërsa rreth 100 të tjerë po presin në anën meksikane të kufirit.
Zyrtarët thanë se në pikën e kalimit San Ysidro është arritur kapaciteti maksimal dhe individët duhet të presin në Meksikë ndërsa oficerët punojnë për të ezauruar procedurat e nevojshme për ata që kanë kaluar. Bëhet fjalë për një grup azilkërkuesish, pjesa më e madhe e tyre nga Hondurasi. Ata u nisën drejt SHBA, më 25 mars, nga Meksika jugore, afër kufirit me Guatemalën. Grupi ka udhëtuar me autobusë, tren dhe më këmbë gjatë rrugëtimit të tyre prej 3200 km deri në kufirin amerikan.
Organizator i këtij udhëtimi ishte organizata amerikane “Pueblo Sin Fronteras” (Popuj pa kufi). Në një pikë të rrugëtimit, u numëruan më shumë se 1 mijë persona në karvan. Shumëkush në grup thotë se po largohet nga persekutimi dhe dhuna në vendin e tyre.
Top Channel
