Anëtari i Presidencës së Bosnjë e Hercegovinës, Bakir Izetbegoviç tha se presidenti Recep Tayyip Erdogan është një lider i madh dhe i shumëpritur nga muslimanët dhe se për këtë arsye nuk është shumë i dashur nga Perëndimi.
Izetbegoviç në një program të krahut rinor të partisë së tij Partia e Veprimit Demokratik (SDA) foli në lidhje me vizitën e Erdogan-it në Bosnjë dhe Hercegovinë më 20 maj.
Ai thotë se në takimin që do të zhvillohet në kuadër të vizitës do të diskutojnë për projektin e autostradës Sarajevë-Beograd, i cili realizohet me mbështetje të Turqisë dhe do të lidh me njëra tjetrën kryeqytetin e Bosnjës dhe Serbisë.
Izetbegoviç theksoi se Erdogan është miku i Bosnjë e Hercegovinës. “Miku ynë nuk është shumë i dashur në Perëndim. Sepse Erdogani është një lider i madh, i shumëpritur nga muslimanët”, tha ai.
“(Ata në Perëndim) nuk po shqetësohen nga muslimanët primitivë dhe injorantë të cilët nuk i shohin si rivalë të tyre. Por, shqetësohen nga një njeri i cili kur bëhet fjalë për zhvillimin ekonomik, shtetin e tij për 10 vite e ka radhitur nga vendi i 20-të në vendin e 10-të, ka ndërtuar aeroportin më të madh në botë, ka marrë mbi supet e tij barrën e luftës së brendshme, terrorizmit, dhe të të gjithë luftërave që po ndodhin përreth kufijve dhe ka hapur dyert për 3 milionë refugjatë”, tha Izetbegoviç.
Ai theksoi se edhe në Bosnjë e Hercegovinë ka njerëz me komplekse, të cilët nuk e duan Erdogan-in. “Ne do t’ia dëshmojmë Erdoğan-it se ka miq dhe të tillë që krenohen me të”, nënvizoi Izetbegoviç./Rtv Islam/
