Stamboll
Turqia do të vazhdojë përpjekjet e saj për të hedhur dritë mbi vrasjen e gazetarit saudit, Jamal Khashoggi, tha presidenti turk, Recep Tayyip Erdoğan.
Duke shkruar një artikull në Washington Post, Erdoğan tha se Turqia do të vazhdojë të bëjë presion për vendndodhjen e mbetjeve të Khashoggit dhe identitetin e atyre që janë përgjegjës.
Duke nënvizuar se shumë pyetje kanë mbetur pa përgjigje në lidhje me procedurat gjyqësore në Arabinë Saudite, ai tha: “Mungesa e plotë e transparencës përreth gjykimit, mungesa e qasjes së publikut në seanca dëgjimore dhe pretendimi se disa nga vrasësit e Khashoggit gëzojnë de facto lirinë nuk arrijnë të përmbushin pritjet e bashkësisë ndërkombëtare dhe prish imazhin e Arabisë Saudite, diçka që Turqia, si miku dhe aleati i saj, nuk e dëshiron”.
“Është në interesin tonë më të mirë, dhe të njerëzimit, të sigurojmë që një krim i tillë të mos kryhet askund përsëri. Luftimi i mosndëshkimit është mënyra më e lehtë për të arritur këtë qëllim. I kemi borxh familjes së Jamalit”, shkroi Erdoğan, duke shtuar se “vrasja e Khashoggit nuk ishte vetëm një tragjedi, por një abuzim i ashpër i imunitetit diplomatik”.
Khashoggi u vra më 2 tetor të vitit 2018 në Konsullatën Saudite në Stamboll. Arabia Saudite fillimisht mohoi çdo njohuri mbi vendndodhjen e tij pasi ai u zhduk, por më vonë u përpoq të fajësonte për vdekjen e tij një ekip të operativëve mashtrues.
Sipas raporteve të OKB-së dhe organizatave tjera të pavarura, ai u vra dhe copëtua. Princi saudit i Kurorës, Mohammed bin Salman, pranoi përgjegjësinë për vrasjen e Khashoggit, por mohoi urdhërimin e vrasjes.
Vrasja ka ngjallur zemërim ndërkombëtar me OKB-në duke bërë thirrje për një hetim mbi rolin e Bin Salman në kryerjen e operacionit. Mbetjet e Khashoggit ende nuk janë gjetur.
