Policia e Vlorës ka dhënë detaje nga ngjarja që ndodhi sot në lagjen ‘Kushtrimi’, ku një 38-vjecar u gjet i pajetë pranë banesës.
Burimet thonë se në trupin e Kreshnik Dashit, konkretisht në pjesën e pasme të shpatullës është konstatuar një plagë e cila dyshohet të jetë shkaktuar nga armë zjarri.
Të njëjtat burime sqarojnë se ndonëse nga veprimet paraprake rezultoi pa shenja dhune, pas hetimeve të mëtejshme, nga ekspertiza e plotë mjeko-ligjore u konstatua se Dashi është vrarë.
38 vjeçari punonte në një firmë këpucësh në qytetin e Vlorës dhe nga ana e Policisë nuk njihet si person me precedent penal.
Në Policinë e Vlorës është ngritur një grup i posaçëm hetimor me qëllim dokumentimin dhe zbardhjen e plotë të ngjarjes. Aktualisht vijojnë hetimet e mëtejshme në bashkëpunim me Prokurorinë për sqarimin e rrethanave dhe vendosjen para përgjegjësisë penale të autorit/ve.
