Sot në mëngjes, në Greqi kanë filluar zgjedhjet parlamentare, proces që u parapri dje nga votat e hedhura nga qytetarët grekë të regjistruar jashtë vendit.
Rreth 9,8 milionë qytetarë do të votojnë në 21 529 qendra votimi për të zgjedhur deputetët e ardhshëm të parlamentit grek.
Nga ky numër, 400 000 janë votues për herë të parë, dhe afro 22 000 ushtruan të drejtën e tyre zgjedhore jashtë vendit.
Qendrat e votimit në Greqi janë hapur sot në orën 07:00 dhe do të mbyllen në orën 19:00.
Personat me të drejtë vote duhet të kenë mbushur 17 vjeç brenda vitit 2023, dhe të jenë të regjistruar në listat zgjedhore.
Sipas Kushtetutës, ushtrimi i së drejtës së votës është i detyrueshëm për të gjithë, duke përjashtuar ata që janë mbi 70 vjeç, personat që nuk ndodhen në vend ditën e zgjedhjeve, ata që nuk mund të udhëtojnë për shkak të gjendjes jo të mirë shëndetësore, dhe ata që janë regjistruar të votojnë jashtë.
Partitë kryesore që pretendojnë krijimin e qeverisë së re janë “Demokracia e re”, e kryeministrit aktual, Kyriakos Mitsotakis dhe SYRIZA, e ish-kryeministrit, Alexis Tsipras.